Korleis verta konge?

Eg har stundom drøymt om å vera konge. Ein slik gamaldags "all makt i mine hender"- figur. Sleppa å spørja andre til råds. Gjennomføra mine private, geniale idear på vegner av meg og mine og heile verda, utan spørsmål, innvendingar og kritikk. Har ikkje du drøymt slik? "Hadde berre eg fått bestemt korleis lovene var utforma, då hadde det vorte ordnings, då!"

Ja, eg trur eg hadde likt å bu i samfunnet mitt. Men slik er det skjeldan. Dersom eg hadde opphøgd meg til konge og handla på vegner av dei som nesten har same meiningane som meg, utan å ha diskutert med dei fyrst, og faktisk endra lovene - då trur eg det hadde vorte bråk! Det er noko med det fine med demokratiet. Du representerer berre deg sjølv, med mindre at du er valt av nokon til å representera dei. Då bør du ha såpass respekt for dei ein representerer at du ikkje berre handlar ut i frå kva du trur er best for dei, eller deg sjølv, men faktisk finn ut kva dei meiner. Og gjer du ikkje det, kan du bytast ut. Men kva gjer ein med sjølvoppnemnde kongar, som handlar på vegner av "folket"? Korleis staggar ein dei?